कांबी

१) भौगोलिक व सामाजिक परिचय
बीड जिल्ह्याच्या वैभवात भर टाकणारे कांबी हे एक प्रगतिशील आणि विकासाभिमुख गाव आहे. भौगोलिकदृष्ट्या हे गाव जिल्हा मुख्यालय बीडपासून सुमारे १० कि.मी. अंतरावर असून, बीड–जालना राष्ट्रीय महामार्ग (NH 12) वरील पेंडगाव क्षेत्रापासून अवघ्या २ ते ३ कि.मी. पश्चिमेला निसर्गरम्य परिसरात वसलेले आहे. सुमारे ११०० लोकसंख्या असलेल्या या गावातील ९०% ग्रामस्थ कृषी व्यवसायाशी जोडलेले असून, येथे प्रामुख्याने आंबा आणि नारळ यांसारख्या बागायती पिकांची लागवड केली जाते.
२) मुख्यमंत्री समृद्ध पंचायतराज अभियान व समर्थ नेतृत्व
गावाचा सर्वांगीण कायापालट करण्यासाठी १७ सप्टेंबर २०२५ पासून आम्ही 'मुख्यमंत्री समृद्ध पंचायतराज अभियाना'त सक्रिय सहभाग घेतला आहे. या अभियानाच्या यशस्वी अंमलबजावणीसाठी:
मा. सरपंच: श्री. लहू आनेराव
मा. उपसरपंच: श्रीमती. रेखा घोरपडे
ग्रामपंचायत अधिकारी: श्रीमती. स्वप्नाली पवार
यांच्यासह सर्व सन्माननीय ग्रामपंचायत सदस्य आणि समस्त ग्रामस्थांचे मोलाचे सहकार्य व योगदान लाभत आहे.

३) प्रमुख वैशिष्ट्ये आणि विकास उपक्रम
महिला सक्षमीकरण (राजमाता जिजाऊ बचत गट भवन): गावातील महिलांच्या आर्थिक प्रगतीला चालना देण्यासाठी मा. गटविकास अधिकारी व विस्तार अधिकारी यांच्या प्रमुख उपस्थितीत 'राजमाता जिजाऊ बचत गट भवनाचे' भव्य लोकार्पण करण्यात आले आहे. हे भवन महिला बचत गटांच्या प्रगतीचे हक्काचे केंद्र ठरत आहे.
स्वच्छता व पर्यावरण: प्लास्टिक मुक्तीसाठी कुटुंबनिहाय कापडी पिशव्यांचे वाटप आणि ओला-सुका कचरा वर्गीकरणासाठी दोन स्वतंत्र डस्टबीन उपलब्ध करून देण्यात आले आहेत.
सुरक्षा व तंत्रज्ञान: संपूर्ण गाव, ग्रामपंचायत कार्यालय, शाळा आणि अंगणवाड्या CCTV कॅमेऱ्यांच्या देखरेखीखाली असून, शाश्वत ऊर्जेसाठी सौर यंत्रणा (Solar System) कार्यान्वित आहे.

आरोग्य व पशुसंवर्धन: गाव 'ॲनिमिया मुक्त' करण्यासाठी आरोग्य शिबिरे आणि पशुधनासाठी लसीकरण व पशुखाद्य वाटपाचे उपक्रम राबवले जातात.
डिजिटल शिक्षण: जिल्हा परिषद शाळेत ई-लर्निंगद्वारे आधुनिक डिजिटल शिक्षणाची सोय करण्यात आली आहे.
धार्मिक व सांस्कृतिक वारसा: कांबी गावाला समृद्ध धार्मिक परंपरा लाभली आहे. गावात सुप्रसिद्ध जालिंदरनाथ मंदिर असून, येथे 'नव्याची पौर्णिमा' निमित्त मोठी यात्रा भरते. तसेच श्री हनुमान मंदिर आणि मारुती मंदिर ही ग्रामस्थांच्या श्रद्धेची केंद्र आहेत. पावसाळ्यात गावाजवळील टेकड्यांचे निसर्गरम्य दृश्य पर्यटकांना आकर्षित करते.
महिला बचत गट, युवक मंडळे आणि सर्व ग्रामस्थांच्या एकजुटीतून कांबी गाव आज 'मुख्यमंत्री समृद्ध पंचायतराज अभियाना'त एक आदर्श आणि समृद्ध गाव म्हणून नावारूपास येत आहे.